毋驚一萬,只驚萬一
男:走-走-走-走-走-(邊走邊唱,動作誇張)
女:(一跛一跛走出來)
男:唉喲~!(驚訝狀)你是安怎,那會包咯一才官若肉粽咧?
女:唉呀!話若欲講透枝,目屎是撥袂離。煞毋知、、、(嘆氣)
男:阿是安怎,你毋就緊講。
女:講來話頭長,欲講-講(管)就一枝長長咧。總講一句,就是孫悟空做投手---豬哥神啦!
男:安怎講,你嘛講清楚說明白!
女:煞毋知,頂禮拜我駛車經過北港路的時,看著一個腰束-奶凸-尻川硬酷酷的查某警察共我曳手。
男:喔桃花當旺ㄛ
女:我嘛安呢想,就共車刹佇路邊,看伊有啥事至?
男:結果咧?
女:伊看我生做緣投擱漂撇,就講:「先走」!
男:即聲你慘啊,人是叫你「行照」提出來。
女:我阿知!我就真正先走,擱對鏡一直看後爿,誰知影、、、
男:今又擱是安怎?
女:就佇同-即個時陣,同-即個所在,「碰」一聲,我就滿天全金條,欲抓無半條,倒佇病院啊!(愈來愈小聲)
男:真正是「苦瓜燉鰱魚」---苦憐喔!
女:這每,我是了錢擱討皮痛,歸個月的薪水去一半。
男:人講:「毋驚一萬,只驚萬一」,性命抑擱留牢咧,佳哉,佳哉。
女:是啊!人講:「入虎口,無死也烏拗」一點啊都袂使失角差。
男:交通既然赫重要,我來考看覓,你是知-抑毋知?
女:無問題!拼看覓,看是欲死豬哥,抑是欲死豬母?
男:好!請問:駛車欲安怎駛?
女:阿就安呢啊!鎖匙開落去,油門共催落去,(含都魯)方向盤huann7予在,就去囉!
男:我看是去了了囉-去!
女:阿無是欲安怎駛?
男:上車愛ha5安全帶,手機仔毋通烏白敲,無眠駛車千萬就毋通,上路平安著免抖。
女:講著安全帶,你稍等一下。(準備道具)
男:今--你是欲創啥?
女:噹-噹--噹-噹(粘上自製的安全帶)
男:你是欲選總統?抑是欲選縣長?
女:攏毋是,是安全帶!安怎!巧honn7。
男:你喔!牛牽到北京嘛是牛!安全帶是欲保護咱的安全,毋是欲ha5好看的。
女:hioh!(不好意思—摸摸頭)真歹勢!
男:擱共你考一條---行路欲安怎行?
女:簡單啦!來來來綴我作<動作>.正跤.左跤.正跤.左跤1.2.1—1.2.1--食菝仔放槍子,食龍眼放木耳,食柚仔放蝦米,食、、、、
男:稍等一下.你咧創啥?
女:你毋是講-按怎行路?
男:我是講行路要注意啥乜?
女:喔!我知啦!行路行路邊,注意青紅灯,過馬路要行斑馬線,目目周毋通四界看。
男:袂禾黑哦!人講「有燒香有保庇,有食藥有行氣」,交通宣導若有聽,交通安全著免驚。
女:對!交通安全毋免聽,聽了心就-會驚驚。
男:我咧!
女:好啦!好啦!咱用簡單的幾句話共交通問題講乎明,你看啥款?
男:好!鬥陣來。
合:交通安全有撇步,家己性命著愛顧
交通標誌認予清,酒瓶仔毋通扣扣親
騎車愛戴安全帽,自然平安無煩惱
駛車著ha5安全帶,手機仔毋通一直敲
踅頭斡角著細膩,看若無車才過去
交通安全做予到,逐家快樂擱消遙呀-擱--消--遙
男:我是簡簡單單予恁百事平安擱安全的男
女:我是予恁遇著我就攏總興的女—你總興(大聲點)
合:祝福逐家—簡簡單單百事齊全—家和萬事興
(行禮下臺)
留言列表